بوملي، فاكهة البوملي أو البوميلو أو الليمون الكبير أو السندي هي نوع من أنواع الليمون بس شكلها شبه الكمترى شوية، قشرتها سميكة ولونها أخضر أو أصفر بهتان ولحمها من جوه ممكن يبقى أصفر أو أخضر أو أحيانًا وردي، وطعمها حلو بس ساعات بيبقى فيها لسعة، وهي قريبة من طعم الجريب فروت بس البوملي أحلى، وحجمها بيكون أد الكنتالوب أو أكبر.
والبوملي مشهور في مناطق كتيرة زي: الصين، واليابان، وتايلاند، وماليزيا، وجمهورية جزر فيجي، وأجزاء من جنوب شرق آسيا.
أولا: فوائد فاكهة البوملي :
- فهو غني بفيتامين ج، اللي يعتبر مضاد قوي للأكسدة، ومُنشط للمناعة، واللي بيساعد في تقليل خطر تلف الخلايا.
- وغني بالألياف الغذائية، اللي بتعتبر مصدر غذائي للبكتيريا المفيدة في الأمعاء.
- وغني بالألياف الغير قابلة للذوبان اللي بتمنع الإمساك.
- وغني كمان بمضادات الأكسدة، اللي بتساعد على منع أضرار الجذور الحرة، اللي بتسبب مشاكل صحية وأمراض مزمنة لما بتتراكم في الجسم بمستويات عالية.
- وكمان الزيوت الموجودة في قشرته ليها خصائص مضادة للبكتيريا ومضادة للفطريات.
- والزيوت دي كمان بتقلل من إنتاج الميلانين في الجلد، وبتساعد على منع تغير لون الجلد.... بس خد بالك الزيوت العطرية دي مُركزة جدًا، فمينفعش تتناولها، ولازم تخففها بزيت ناقل قبل ما تحطها على بشرتك.
- والبوملي نفسه مفيد عامةً للبشرة ومقاوم لعلامات الشيخوخة، وده لأنه غني بمضادات الأكسدة وفيتامين ج.
- مفيد لصحة الشعر ونموه، عشان فيه فيتامينات أ ، ج ، ب والزنك. وبيعالج كمان القشرة عشان فيه نسبة عالية من الماية وفيتامين ج.
- ومفيد كمان للرجيم، لإن البروتين والألياف الغذائية اللي فيه بتدي إحساس بالشبع مدة طويلة.
- وممكن يقلل من خطر الإصابة بالسرطان، وبيعزز من صحة القلب عن طريق تخفيض مستويات الكوليسترول والدهون الثلاثية، بس دي دراسات لسه أولية اتعملت على الحيوانات بس.
ثانيا:أضرار فاكهة بوملى:
- الحساسية لبعض الأشخاص، وبتظهر على شكل احمرار أو حكة أو تقرحات في الفم و انتفاخه أو طفح جلدي أو جفاف في الجلد وتقشيره أو انتفاخ في الحلق.
- اضطرابات في الجهاز الهضمي زي: الانتفاخ، أو الإسهال، أو آلام في البطن.
- وكمان ليه تأثيرات على الجهاز التنفسي زي: السيلان، أو انسداد الأنف، والعطس، والصفير.
- وبالنسبة للأشخاص اللي عندها حساسية من الحمضيات يبعدوا عنه.
- ولو حد بيعاني من أمراض الكلى والكبد، يبعد عنه برضه عشان البوملي فيه نسبة عالية من البوتاسيوم وفيتامين سي.
- وكمان الأشخاص اللي بيعانوا من الحموضة العالية، ومن مشاكل في الأغشية المخاطية للمعدة والأثنى عشر، لإنه فيه نسبة عالية من الأحماض، واحتمال تزيد معاه الأعراض اللي بتيجي من الارتداد المريئي، والإصابة بحرقة المعدة.
- بيخفض من ضغط الدم بشكل كبير.
- وللأسف مفيش دراسات كفاية عن الآثار الجانبية للبوملي لو أتاخد مع أدوية وعشان كده الدكاترة في جامعة هارفرد بتعتقد إنها زي الآثار الجانبية اللي بتحصل لما حد بيتناول أدوية مع الجريب فروت، وخصوصًا الأدوية اللي بتُستخدم لعلاج ارتفاع نسبة الكوليسترول (والأدوية والأثار الجانبية دي اتكلمنا عنها في بوست مخصوص عن الجريب فروت هنسيب اللينك بتاعه في التعليقات تحت إن شاء الله)، وعشان كده من الأحسن إنك متاكلش ولا تشرب البوملي لو بتاخد أي نوع من الأدوية أو المكملات الغذائية.
- وفيه كمان أثر جانبي نادر بس خطير جدًا وهو صدمة الحساسية، و اللي من أهم أعراضها: صعوبة التنفس، وفقدان الوعي، واحمرار الوجه والرقبة، والغثيان، والقيء، والإسهال، والانخفاض الحاد في مستويات ضغط الدّم، وانتفاخ الفم والحلق، والتغير في نبض القلب إما بزيادة عدد دقات القلب وإما بانخفاضها عن المستوى الطبيعي. وفي الحالة دي لازم الشخص يروح بسرعة جدًا الطوارئ الطبية ويعالجها فورًا.
مرحبا، أسمي نانا أحمد وهذه مدونتي أسعى دائما لأقدم لكم أفضل المواضيع المنوعة فى الصحة والحياة الأسرية والتكولوجياوالطبخ والفنون والموضة 
ليست هناك تعليقات:
إرسال تعليق