رواية عشق تاج الصعيد البارت 3
طيب يا حبيبتي ارجعي وأنا هنا مستنياكي... بس لو رجعتي لازم تواجهي وتسمعي اللي لازم يتقال.
تاج بصوت أقوى من قلبها لكنه مكسور
أنا جاية بس مش علشانه
أنا جاية علشانك إنتي وبابا
تاني يوم كانت داخلة تاج بيت العيلة وهي علي وشها ابتسامة جميلة وبتسلم علي كل الموجودين وغصب عنها عنيها بتدور عليه.. هو ادهم بس لسة مشفتهوش ووقفت تسلم بحرارة علي امها وابوها راضي اللي كان باين عليه الفخر والفرحة وسط ناس البلد
راصي بفخر
نورتي بلدك يا بتي يا باشمهندسة جد الدنيا
تاج بابتسامة
بلدي منورة باهلها يابا انا متشكرة ليكم كلكم علي مجيكم ههنا حجيجي انا اللي فخورة بيكم واني وسطيكم
وصايف بابتسامة
ده احنا فرحانين برجوعك وسطنا اكتر من اي حاجة في الدنيا يا بتي
تاج بحب
يخليكي ليا يا ست الكل يارب
نرجس بسخرية من وراهم
ااهلا يا بت عمي نورتي البلد بس مش كانت هتبجي فرحتنا اتنين لو كنتي رجعتي بعريس مع الشهادة ولا ايه يا مرت عمي
وصايف بضيق
بتي لو فكرت الف من يتمني يتجدملها يا نرجس بس هي كانت مركزة في علامها
وبس وبكرة يجيلها عدلها وبعدين اهي عالاجل فالحة في حاجة مش احسن ما كانت اتجوزت ومعمرتش
نرجس بصت لوصايف بغضب وسابتهم ومشيت واستغربت تاج كلام امها بس معلقتش او اتشتت بسبب ادهم اللي شافته داخل من باب البيت وقلبها دق بعنف وقتها وعنيها متعلقة بعيونه اللي كانت بطالعها بلهفة مكتومة
أدهم وهو بيقرب منها بخطوات ثابتة
مبروك يا تاج ... الدار نورت
تاج بتحاول تسيطر على ارتباكها والابتسامة لسه ع وشها
الله يبارك فيك يا ادهم كيفك
ادهم بجمود
زين يا باشمهندسة... تعبتي وشجيتي وتستاهلي الفرحة ولا ايه
تاج بنظرة فيها وجع
اكيد اربع سنين من عمري تعب استاهل اني افرح عشانهم
أدهم بصوت حاد شوية
أظن مش محتاجة حد دلوك... انتي اختارتي طريجك من زمان.
سيبتي كل حاجة ومشيتي وحتي مبصتيش وراكي.
تاج متفاجئة بلهجته بس حاولت تبرر بهدوء
ما كانش سهل عليا... بس انا كنت بحجج حلمي وكان لازم أمشي... لاني كنت واثقة إن مفيش حاجة هتتغير بوجودي
أدهم بضحكة قصيرة بس فيها مرارة
وانتي فاكرة إن الدنيا بتستناكي أربع سنين يا تاج... أربع سنين ما سألتيش ما همكيش حتى ماهتمتيش تعرفي عننا حاجة.
تاج بصوتها القوي وهي بتحاول ماتبينش ضعفها
أنا كنت..
أدهم يقاطعها بحدة وكبت سنين
كنتي بتدوري على نفسك... تمام لجيتيهاولا اكتشفتي إن في حاجات بنخسرها واحنا فاكرين إننا بنجري ورا حلم
تاج بصتله والدموع بتلمع في عنيها بس بتحاول تفضل قوية
أنا مش محتاجة أبرر يا أدهم ولا هطلب منك سماح... أنا جيت بس عشان أكون وسط أهلي... وأفرح معاهم ولو رجوعي مضايجك عادي ممكن امشي
أدهم بصلها بثبات
وسط أهلك عندك حق يمكن الدار
دي لسه زي ما هي... بس انتي اللي اتغيرتي... زمان كنتي بتسمعيني من غير ما أتكلم دلوجتي حتى الكلام بجى ملوش مطرح بينا
تاج وقفت لحظة وهي متجمدة مكانها وقلبها بيرتعش وهي بتسمع الكلام ده اللي عمرها ما كانت تتوقع انه يطلع منه وكانت متابعاه وهو بيسيبها ويمشي
ووصايف بتبص لتاج تلاقيها واقفة مش قادرة تتحرك وعنيها بتلمع وإيدها على قلبها كأن الجرح القديم اتفتح... من غير ما هو حتى يقصد
تاج كانت قاعدة على طرف السرير وعنيها كلها دموع وإيدها ماسكة الموبايل بس مش قادرة تبص فيه. وبتكلم نفسها بصوت عالي وهي منهارة .
تاج بانهيار
كيف! كيف يكلمني كده... هو فاكر نفسه ايه كيف ليه عين يعاتبني!
وهو اللي خلاني أمشي... هو اللي وجع جلبي وخلاني أهرب من كل حاجة...ده أنا اللي سبت البلد وسبيت أهلي... وسبيت قلبي عنده وهو واقف زي التمثال ما اتكلمش ما قالش حتي انه اسف
كملت تاج بحزن
ودلوجتي! جاي يعاتبني
جاي يكلمني كإني أنا السبب
وأنا ازاي مردتش عليه! ازاي
ده أنا اللي اتجهرت أنا اللي اتجرحت...وهو السبب فكل حاجة...هو اللي خلاني أدفن مشاعري وأعيش كأني حجر عشان شايفني عيلة صغيرة
وصايف دخلت الأوضة بهدوء ولقت تاج منهارة فقربت منها وقعدت جنبها على الأرض واخدتها في حضنها
وصايف بحنية
اهدي يا بتي... اهدي
أنا عارفة إنه وجعك... بس هو عنده حج.
تاج بتنتفض وبصتلها بعنين مليانين دموع
ليه يا أما!ليه يكلمني كده
أنا اللي كنت بحبه جوة نفسي ومن ورا الكل...ومرضتش أقول ومردتش أتكلم...وبعد كل ده يجي هو ويقولي إني نسيت!
وصايف بهدوء
هو مجرحش فيكي... هو موجوع.
ادهم يا تاج من يوم ما مشيتي وهو ما بجاش هو...كأن روحه اتسحبت منه
كان عايش في بيت كبير بس فاضي...انتي كنتي بته وكأنك خطفتي روحه معاكي.
ف ليه ما ياخدش على خاطره
وليه ما يزعلش
ما تحاسبيهوش على عشقك ليه اللي حتى هو معرفش عنه حاجة...
تاج بصوت مخنوق
بس هو جرحني...جرحني بسكوته وبروده...لكن أنا حبيته من قلبي وهو اختار غيري...اختار نرجس...
وسابني في سكتي لوحدي
وصايف بتاخد نفس وتبص لتاج بجدية
ما انتي متعرفيش يا بتي...
ادهم طلق نرجس من سنتين
تاج بصدمة وهي بترجع ضهرها
ايه!طلقها كيف!
وصايف بهدوء
من أول سنة جواز...ما شافوش يوم عدل سوا... كلها خناق... كل يوم على سبب تافه...
كلها قلة عقل وطمع من نرجس طلبات مبتخلصش أسلوب مش عاجبه...وهو ما استحملش.
طلجها بعد ما فاض بيه
تاج عينيها بتدمع تاني بس المرة دي مش بكاء... فيها وجع متكتوم
بس ده...ده مش هيغير حاجة يا أما..... ادهم خلاص...جلبه مبجاش ليا...ولو رجع دلوقتي مش هرجع أنا.
وصايف بتبصلها بصدمة
يعني ايه
تاج بقوة وهي تبص للمراية
يعني من النهاردة...أنا مش هبجى ضعيفة أنا مش هرجع تاني نفس الدوامة هو اختار من الاول
... وأنا كمان دلوقتي هختار.
وصايف بصت لبنتها بنظرة فيها حزن وشفقة في نفس الوقت وهي من جواها متأكدة انها لسة بتحب ادهم بس كبرياءها اللي مخليها بتعاند
بعد يومين من الاحداث اللي حصلت كانت قاعدة تاج في الصالة وعنيها مركزة في الاب توب ومخدتش بالها من ادهم اللي دخل وعينه مراقباها وكأنه بيشبع عنيه بيها لحد ما انتبهت ليه وعينهم اتقابلت فجأة وكل حاجة وقفت لحظة.
أدهم بهدوء
مساء الخير
تاج بنفس الهدوء وكانها متعمدة تثبت لنفسها ان مفيش حاجة
مساء النور.... شكلك كنت في مشوار طويل
أدهم بهدوء وهو بيقعد قدامها
ايوة مشوار شغل اصلي مليش في جو النت والاب توب ده والهندسة
تاج بتوتر
ربنا
يقويك بس جو النت والاب توب ده مهم عشان اعرف اتواصل مع صحابي اللي كنت عايشة معاهم هناك
ادهم وقف لحظة وبعدين يقول بضيق
وانتي يا تري صحابك دول بنتة زيك ولا شباب
تاج بقصد وهي بتبص لادهم
الاتنين اصل انا كنت مصاحبة شباب وبنات في الجامعة هناك
أدهم بصلها بغضب وانفعال
كيف يعني تصاحبي شباب فاكرة حالك من بنتة مصر اياك كأن مفيش حيا ولا ادب
تاج بغضب
اولا انا محترمة ومؤدبة ثانيا بقي ايه يعني لما يبقي عندي صحاب شباب دول زمايلي في الجامعة يعني بتعامل معاهم بحدود ثالثا ما انت اهو بتكلم معاك رغم انك مجرد واد عمي ومفيش صفة بينا يعني لا جوزي ولا خطيبي
ادهم بكسرة
يتبع