رواية المعلم ومراته وزوجته البارت 33 و الاخير كامل

بعد تبادل الارقام نزلت علا عند بيتها وكمل بعد كده على ومامته وهما في الطريق
ام على : باين عليها بنت حلال علا بس غريبه ان علاقتها باهل طليقها حلوه وكلها ود كده
دكتور على : لان جوزها كان انانى وشخص نرجسى
ام على : هى مالهاش اهل
على حكالها  كل قصتها وكل اللى يعرفه عنها
ام على: كويس انها سابته هى ماتستهلوش ربنا يرزقها بالاحسن وبالصالح وواضح انه هيحصل قريب عشان فى واحد كلمها انهارده اللى قلتلك عليه ده
على بصلها بطرف عينه ومامنش على كلامها وصلوا البيت وكل واحد دخل غرفته
***********
عند اشرقت وببجاد
عشق كانت حلوه انهارده اوى
بيجاد : ربنا يوفقها وجوزها واضح عليه محترم اوى
اشرقت: اخدت بالى على فكره
بيجاد: من ايه
اشرقت: من تجاهلك لعلا وانك كنت بتغض بصرك عنها
بيجاد: مابقتش تحللى عشان ابصلها انا مطلقها طلاق بين
اشرقت : محنتلهاش
بيجاد : حاسس بالذنب بس وده طاغى على اى احساس تانى عندى ولو لسه بحبها مش هتمنى ان ربنا يكرمها بابن الحلال
اشرقت: واضح انه هيبقى قريب
بيجاد : حد طلبها ولا ايه
اشرقت: يعنى دكتور على كان عينه عليها طول الفرح وفى دكتور تانى برضه كلمها انا اخدت بالى وغير كده مامت على جت سالتنى عليها واستغربت لما عرفت انها ضرتى
بيجاد : حس ان الكلام هيضايقه قفل معاها ربنا يوفقها واللى فيه الخير يقدمه ليها بقولك ايه مش ناويه بقى نخاوى سند هيفضل وحيد كده كتير
اشرقت: قصدك ايه
بيجاد : قصدى تسكت شهر زاد عن الكلام الغير مباح 🤭🤭🤫🤫🤫
*****************
عند باسمه وجاد فى التليفون
جاد : عقبالنا بقى
باسمه ضحكت بكسوف
جاد : خلاص هانت كلها شهر ونعمل الفرح بقولك صحيح اهتميتى بلبس البيت
باسمه: اه جبت جلاليب وبيجامات حلوه فى لون معين بتحبه
جاد : انا مالى ومال الجلاليب والببجامات جبتى من  الحاجات التانيه ولا اجيب انا
هنا باسمه اتكسفت وقفلت السكه فى وشه وجاد فضل يقهقه من الضحك على كسوفها

********************
تانى يوم فى المستشفى كان داخل على من البوابه وكانت علا واقفه تتكلم مع اخوها في التليفون
علا : الو يا حبيبي انت عامل ايه
اخوها : وحشتيني يا علا اوى فكرتى فى كلامى بخصوص انك تيجى تعيشى معايا هنا
علا : صعب اوى انا خلاص بنيت نفسى وليه شغلى وشقتى وربنا عوضنى بام منعم ام تانيه ليه انا دلوقتي راضيه بحياتى وحباها كده سبنى اكمل فيها
اخوها : خلاص يا حبيبتي اللى يرسحك وانا فى اقرب فرصه هنزل مصر عشان اشوفك واطمن عليكى
علا : توصل بالسلامه يا حبيبي مع السلامه
اخوها : مع السلامه اشوف وشك بخير
بعد ما خلصت المكالمه قابلت قدامها دكتور على
علا : دكتور على ازى حضرتك
على : بخير يا علا عامله ايه فى الشغل مرتاحه هنا
علا : اه يا دكتور مرتاحه جدا ومبسوطه اوى بجد شكرا ليك على دعمك وثقتك فيا
على : من اول مره شفتك فيها وانا متاكد انك محتاجه فرصه ولو الفرصة جتلك هتقدرى تستغليها عشان تعيشى حياة افضل من اللى فاتت وبالفعل رأيى فيكى طلع في محله
علا : بلمعه عين وانا كلامك ده بيشجعنى وبيحببنى دايما في الحياة
على : لو احتاجتى اى حاجه في اى وقت اوعى تترددى لحظه واحده انك تكلمينى انتى عارفه مكان مكتبى
علا : اه يا دكتور شكرا ليك مع السلامه وسابته ومشيت وهى عنيها بتلمع وقابلتها عشق
عشق : ايه لمعه العيون دى بقالنا فتره ماشوفنهاش
علا : انتى بتقولي ايه مافيش الكلام ده طبعا انا بس مبسوطه عشان دكتور على معجب بشغلى
عشق: اه قولتيلى دكتور على معجب بشغلك انا فكرته معجب بحاجة تانيه
علا : عشق  اخص عليكى وبعدين ازاى تفكرى ان دكتور زى دكتور على ممكن يبص لواحده زى
عشق : زيك ازاى انتى زى القمر ومتعلمه
علا : مش بالشكل يا عشق اولا مطلقه ثانيا وضع اجتماعى وعلمى مختلف واحد زى دكتور على ده لما يفكر يتجوز هيجتوز واحده زيه على الأقل دكتوره او مستوى اجتماعى متقارب إذا كان اخوكى كان مخلينى في السر عشان وضعه الاجتماعي مع أنه ماديا اقل من دكتور على  مع احترامى ليكوا كلكم يا عشق ما بالك بقى واحد بوضع دكتور على كونه يكلمنى اصلا او يقف معايا ده فى حد ذاته تواضع وانتى جايه تقوليلى اعجاب
عشق : عارفه يا علا مشكلتك ايه انك مش عارفه قيمه نفسك
علا : لا انا مش هبص لفوق عشان ماتعبش عن اذنك عشان متاخرش على الشغل
مشيت علا وسابت عشق بتفكر في كلامها
عشق لنفسها انا متاكده من ان دكتور على معجب بعلا
اثناء شرودها قابلت سامح
سامح: مالك يا عشق سرحانه في ايه
عشق: في علا
سامح: حصلها حاجه او حد ضايقها
عشق لأ
سامح: أمال في ايه
عشق حكتله كل اللى قالتهولها علا
سامح: مايمكن دى اوهام في دماغك
عشق: لا انا متأكده بقولك ايه عايزاك تساعدنى
سامح: اساعدك ازاي
عشق: هقولك
**************
عدا كام يوم تانى وراحت عشق لعلا وقالتلها ان خطوبه صاحبتها بكره ولازم تجهز وطلبت منها تنزل تختار معاها فستان وعلا وافقت وبعدها راحت لدكتور على
**********
عشق : خبطت على باب مكتبه ودخلت
دكتور على
على : اتفضلى يا عشق
عشق: بعد اذنك محتاجه انهارده بقيت اليوم اجازه
على : فى حاجة مهمه
عشق: اه خطوبه علا صحبتي ومحتاجة انزل اشترى شويه حاجات وبعد ازنك هعمل اذن كمان لعلا
على : علا ،🔥🔥🔥🔥🔥 عشق ممكن تاخدى إذن انما علا صعب وغير كده هى ليه مجتش طلبت منى بنفسها.  الأذن مرفوض واتفضلى على شغلك ولو هى عايزه إذن تيجى تاخده بنفسها
كان قاعد على على نار 🔥🔥🔥من فكره انها لحقت تتخطب وهو مستنى شهور العده تخلص عشان يكلمها وقرر ان يتكلم معاها قبل خطوبتها
دكتور على اتصل بالسكرتاريه وطلب منهم يبعتوله علا وعلا دخلت المكتب
على : تعالى يا علا محتاج اتكلم معاكى
علا : اتفضل
على : انتى لسه فى مشاعر ناحيه بيجاد
علا : لأ طبعا ( لان من جواها فى مشاعر لعلى لانه تقريبا قدامها كل يوم وبتسمع مدح زمايلها وغير كده تحفيزه الدايم ليها خلى غصب عنها مشاعرها اتحركت ناحيته)
على : طيب والعريس الجديد
علا : حضرتك عرفت منين
على : اتاكد من كلام عشق انه صح
: ممكن تجاوبيني
علا : لأ
على : طيب حدديلى معاد بكره مع ام منعم واهلك جاى اقابلهم
علا واقفه مبلمه مش فاهمه او بتحلم هى حاسه فى حاجة غلط ومش مجمعه 😳😳
علا : حضرتك مش فاهمه تقصد ايه
على : حضرتك ايه يا علا انا عايز اتقدملك واتجوزك وتقوليلى حضرتك
علا : 😳😳
على : علا انتى معايا
علا : اه معاك
على : طيب بكره يا علا بكره ها حدديلى معاد عشان اجى انا وامى
علا : حاضر وسابته ومشيت وحاسه انها بتحلم وهى ماشيه قبلت عشق ومكنتش شايفاها
عشق : علا يا علا
علا : ها نعم يا عشق
عشق : مالك يا بنتى فى ايه
علا : هو انا صاحيه ولا نايمه
عشق : انتى صاحيه وفى الشغل كمان
علا : يعنى حقيقى
عشق : هو فى ايه
علا : دكتور على عايز يتقدملى بكره
عشق بفرحه بجد طيب حلو اوى هبلغ ماما وبابا عشان يحضروا ويقابلوه
علا : اللى انتى شايفاه اعمليه انا ماشيه وسابتها وراحت الحمام واتصلت بام منعم
ام منعم : الو علا انتى كويسه
علا : اه يا ماما انا كويسه بقولك دكتور على
ام منعم : ماله
علا : عايز يجيى يقابلك عشان يطلبنى منك
ام منعم زغرطت الف الف مبروك يا حبيبتي هاتيه بكره وقفلت معاها وكانت عشق كلمت مامتها وباباها وبلغتهم وهما فرحوا اوى وقرروا يروحوا كلهم بما فيهم جاد وبيجاد وباسمه
عدا اليوم بدون اى احداث جديده
روح على اخر اليوم قبل ما يمشى عدى على علا
على : علا تعالى يلا عشان اوصلك
علا : مافيش داعي انا بروح كل يوم لوحدى
على : لأ مافيش الكلام ده ويلا عشان بالمره اعرف مكان بيتك
مشى على ومعاه علا واخدها قاعدوا فى كافتريا عشان يتكلموا
على : عارفه يا علا انا كنت معجب بيكى من اول مادخلتى المستشفى وكنت برفض اكلمك او احاول اقرب منك عشان كنتى لسه متجوزه وبعديها لسه كنتى غى العده وكان حرام انى احاول اتقرب منك عشان اسمه تخبيب
علا : يعنى ايه تخبيب
دكتور على هقولك قصه حلوه
.
  واحد بيحب واحدة متجوزة !!!!

بيحبها بجنون وشايف ان دي حاجة مش بإيده ،،
بتحبها ومش بإيدك ؟ ماشى
ابعد وحاول تنساها بس متخالفش الشرع ✨ ..
افرض خالفته ،، ده اسمه التخبيب.
يعني كلمتها أو شاغلتها ده اسمه تخبيب ،، حتي لو مافيش زنا وملمستهاش ،، اسمه برضو تخبييب
وده من الكبائر ،، نقطه ،، انتهي ..
والتخبيب هو إفساد المرأة علي زوجها أو إفساد الراجل علي مراته ..
في الحديث " ليس منا من خبب امرأة علي زوجها "
وفي الحديث برضو " لا يدخل الجنه خب "
وخد بقا التقيلة
لو اتطلقت ملكوش جواز وجوازكم باطل "عند المالكية والحنابلة"
طب انا كلمتها ومتطلقتش ؟؟
ده اسمه تخبيب ومن الكبائر وجوازكم هيبقي باطل
لو انشغلت وأعرضت عن زوجتك أو هي أعرضت عن زوجها
وعاشت في تشويش خاطر وبلبلة فكر وقلق نفسي وتوتر أعصاب وتكدير لحياتها الزوجية ،، ده اسمه تخبيب ومن الكبائر تانى
وجوازكم هيبقي باطل
طب انا بحبها وكلمتها وهي اتطلقت لأسباب تانيه ؟
ده اسمه تخبيب ومن الكبائر ،، وجوازكم باطل برضو

_طب أنا كلمتها ومعملتش أي حاجة تانيه ومقصدتش افسد عليهم حياتهم ؟
ده اسمه تخبيب ومن الكبائر ، وجوازكم باطل

_طب انا كلمتها وتبت وهي كدا كدا كانت هتطلق ؟
ده اسمه تخبيب ومن الكبائر ،، وجوازكم باطل

_الجواز هنا "باطل" عند "المالكية" لعِظَم الذنب وكعقاب دنيوي للمخببين ومعاملتهم بنقيض قصدهم

والكلام ينطبق علي الرجال والنساء 👌🏻 ..
وده شامل معجنة الاختلاط في الشغل وميادين الحياة
زى مين خدت ده من مراته ومين خد دي من جوزها ،، ويمثل حوالي ٧٠٪؜ من حالات الطلاق اللي هتشوفها ..

والعك ده كله داخل فيه الفضفضة والدردشة والمرقعة ودحرجة التماسي في مزبلة السوشيال ميديا مع زميلى أو زميلتى فى العمل أو الدراسة أو اى مجال فى الحياة ، وده كتير وسهل و بقا "عادي" جداً دلوقتى ..

أي كلمة أو تلميحة ممكن أوي تدخلك في الخانه دي وانت ولا علي بالك ،، وحتي لو متقصدش

مينفعش تقول لزميلتك ، كتكوتة ، شطورة ، صغنونة ، أمورة ، يلا علشان احبك .. الخ ،، من كل الالقاب اللى ملهاش علاقة بالشغل .

_كل دى كبائر كتير تُرتكب دلوقتي وبيتقال عليها "عادي"
_فاللهـم اني اعوذُ بگ من الخبث والخبائث ،
على : فهمتى بقى ليه كنت دايما بحاول ابعد عنك وبطمن من بعيد لبعيد بس عشان ماقعش في الكبائر
علا على كبر جدا جدا فى نظرها بعد كلامه ده واتمنت فعلا انه يكون من نصيبها فضلوا يتكلموا وهو حكالها كل حاجه عنه وهى حاكتله كل حاجه عنها وعن عيلتها وجوازها من بيجاد بعد كده وصلها البيت ووصل هو كمان بيته
دخل على الصالون لقى مامته قاعده
على : ماما عايزك فى موضوع
ام على: هنروح نتقدم لعلا امته
على : 😳😳عرفتى منين حد كلمك
ام على: مين هيكلمنى يا دكتور انت مش شايف نفسك دى مصر كلها عرفت انكم بتحبوا بعض إلا انتوا
على : هى علا كمان باين عليها
ام : على 😂😂😂😂😂 

 

ام على : يابنى ده انتو طول الفرح انت باصص عليها ولما هى تبص عليك تدور وشك ولما انت تبص عليها تدور وشها دى مصر كلها لاحظت وانتوا مش واخدين بالكم
على باحراج : طيب بكره على ٨ كده هنروحلهم ان شاء الله
***************
عند دهبيه اتصلت بعلا
علا : ازيك يا حبيبتي عامله ايه
دهبيه : ازيك يا علا صحيح الكلام اللى سمعته ان دكتور على جاى بكره يتقدمك ام منعم قالتلى هى وعشق
علا : اه يا طنط فعلا هو كلمنى انهارده وطلب انه يقابل اهلى بكره
دهبيه : كده يا علا وانتى مش تقوليلنا هو انا وزيدان مش قولنالك اعتبرينا اهلك
علا : انا لسه كنت هكلمكم لانى لسه داخله الشقه حالا لسه حتى مغيرتش هدومى
دهبيه : خلاص اذا كان كده سماح بكره الجمعه هتلاقينى انا وعشق معاكى من اول اليوم وزيدان وجاد هيجوا بليل
علا : تنورونى طبعا
قفلت معاها علا وكانت مبسوطه لانها حاسه إن ليها ضهر حتى لو مش من دمها بس كون إن فى حد مهتم بيا ده فى حد ذاته شعور جميل
نامت علا وصحيت تانى يوم على صوت عشق وهى بتصحيها وحضرالها فستان حلو لونه دهبى ومعاه كل مستلزماته ودهبيه كانت جايبه معاها الناس اللى بيساعدوها في البيت وكانت جايبه الغدا جاهز على السوا والحلويات وكل شئ ممكن يحتاجوه
***************
عند بيجاد وزيدان وجاد
زيدان: انهارده دكتور على هيروح عشان يخطب علا وكلنا هنكون معاها انا وامك واخواتك
بيجاد: ربنا يتمملها على خير
جاد : من قلبك يا بيجاد
بيجاد: صدقني انا بتمنالها السعاده انا الحمدلله مبسوط فى حياتى مع اشرقت واتمنى انها تعيش حياه سعيده
زيدان: طيب انت طبعا ماينفعش تيجى معانا
بيجاد : عارف عشان مايكونش في حساسيه من اى نوع لأى حد
جاد : تمام ربنا يقدم اللى فى الخير احنا قلنا نعرفك عشان لو لسه في اى حاجه جواك تعرف ان ماعدش ينفع
بيجاد : ماتقلقش واتفضل الشيك ده المؤخر بتاعها مممن تديهولها ولو احتاجت حاجه تعتبرنى زى اخوها
جاد : متقلقش انا وابوك موجودين انا بعتبرها اختى وابوك بيعتبرها زى بنته
لبس جاد وزيدان وفعلا راحوا عند علا وطلب زيدان من علا انهم يتكلموا لوحديهم شويه
زيدان: تعالى يا علا اقعدى طمنينى عليكى انتى عامله ايه
علا : انا بخير الحمد لله
زيدان: انا دايما بطمن عليكى من دهبيه وبوصلك سلامى معاها
علا : بيوصل
زيدان: علا انتى لسه في حاجه من جواكى من ناحية بيجاد
علا : لا بيجاد بقى ماضي بالنسبالى وانا حاليا عايزه اعيش الحاضر
زيدان: طيب الحمد لله بالنسبة لدكتور على انتى فى مشاعر ناحيته ولا هو بالنسبالك فرصه لتكوين بيت
علا : لا انا مش بفكر بالطريقه دى نهائى انا من ساعت ماشتغلت في المستشفى دايما بسمع عن دكتور على وعن الخير اللى بيعمله وازاى هو انسان طيب ومواقفه معايت وتشجيعه الدائم ليا كل ده خلى ليه مشاعر فى قلبى .
زيدان: تمام يعمى انتى مقتنعه بيه من قلبك وهقلك
علا : بصتله بخل وسكتت
زيدان: افهم من كده السكوت علامه الرضا . يبقى على خيره الله هو كلمنى وقالى هيجى الساعه ٨ بالظبطت يعنى فاضل ربع ساعه شوفى ايه اللى ناقصك فيها
صحيح خدى الشيك ده
علا : ايه ده
زيدان: ده المؤخر بتاعك خديه وشوفى عايزه تعملى ايه بيه
علا : بس اما مش محتاجاه
زيدان: انا عارف بس ده حقك بلاش جدال يلا عشان تلحقى
علا اخدت الشيك ودخلت اوضتها وكانت عشق مستنيها عملتلها الميكب وجهزتها
عشق: بسم الله ماشاء الله زى القمر يا علا
علا : حبيبتي يا عشق شكرا على وجودك جمبى
عشق: وشكرا انك فى حياتى . بقولك دكتور على جه بره مش يلا عشان تقدمى المشاريب
خرجت علا وقدمت المشاريب
ام على : بسم الله ماشاء الله احنا انهارده جايين طلب ايد علا لعلى ابنى
زيدان: واحنا يشرفنا دكتور على سمعته سابقاه والكل بيشكر فيه وعلا بنتى ونعم البنات
دكتور على: انا كنت بستاذن حضرتك اننا نعمل كتب كتاب ودخله على طول انا الفيلا بتاعتى جاهزه وهى تيجى تشوفها ولو محتاجه اى حاجه انا ممكن اغيرها
زيدان: انتى رأيك ايه يا علا
علا كانت ساكته ومحرجه
ام على : السكوت علامه الرضا يبقى على خيره الله الشهر الجاى ده على طول يبقى الفرح وكتب الكتاب عشان لو فى حاجه ناقصه نلحق نجبها
على : طيب نقرا  الفاتحه بقى
كلهم قاعدوا وقروا الفاتحه وبعد كده اتشعوا فى جو من الفرح وزيدان ودهبيه كانوا مبسوطين عشان خاطر علا لانها طيبه وتستاهل
**************
عند بيجاد واشرقت
اشرقت: يعنى انهارده خطوبه علا
بيجاد: اه
اشرقت: وانت مرحتش ليه
بيجاد: عشان مايكونش في احراج لحد وخصوصا إن دكتور على كان عارف انى جوزها فملهاش لازمه اروح كده كده كلهم معاها
اشرقت : انت متضايق
بيجاد: لا مبسوط عشانها انت كنت عايش بذنبها
اشرقت: لا ده نصيب ماتشلش ذنب حد
بيجاد: عندك حق
**************
عند جاد خرج وكان بيكلم باسمه
جاد : علا اتقرت فتحتها لدكتور على
باسمه: ربنا يتمملها على خير
جاد : بقولك ايه فرحهم الشهر الجاى احنا بقى نعمل فرحنا اخر الشهر ده انا بكره هكلم باباكى واحدد معاه ميعاد
باسمه : خلاص وانا موافقه ولو سالنى هقوله موافقه
جاد : اهم حاجه المعاد مناسب متفاجئش بيوم الفرح بحاجة تاجل الدخله
باسمه بعدم فهم : حاجه زى ايه
جاد : حاجه من حاجات البنات دى
باسمه قصدك على مكملتش كلامها وراحت قفلن السكه فى وشه وده خلى جاد يضحك عليها بيحب يشوف تصرفتها لما بيكسفها
رجع تانى للقاعده وكانوا بيتفقوا على الدهب والمؤخر
ام على : احنا بكره ننزل نجيب الدهب والميزانية مفتوحه اللى انتى عايزاه هاتيه
علا : ربنا يباركلنا فيكى
ام على : وانتى يا ام منعم هتيجى تعيشى معانا الفيلا كبيره وهما هياخدو الدور اللى فوق كله ليهم وانا وانتى الدور اللى تحت واهو نسلى بعض
ام منعم : لا انا كفايه عليا كده وهرجع بلدى بقى
علا وشها قلب وبصتلها بدموع
: عايزه تسبينى انا بعتبرك امى
ام منعم: انا اطمنت عليكى وسيباكى مع ناس بتحبك
علا : لا انا عايزاكى جمبى ماتسبنيش وكل فتره نسافر سوا نقعد كام يوم هناك انا كده كده حبيت المكان هناك ايه رايك
ام منعم : يابنتى هبقى حمل عليكى وكل واحد بيحب ياخد راحته في بيته
ام على : ماتقلقيش هيكون ليكى جناح كامل كل واحد هيكون ليه جناح كامل
ام منعم: خلاص يا علا انا كمان اعتبرتك بنتى ومش هسيبك وهقعد معاكى
ام على : ربنا يخليكم لبعض
جه اخر الشهر وكان فرح جاد وباسمه وكان الكل حاضر ومبسوط والكل مرتاح البال وكان بيجاد لسه بيروح لدكتور حسن كل فتره عشان يقدر يسيطر على نفسه وعلى طباعه ويخف من سلوك التملك والانانيه والنرجسيه وكانت اشرقت واقفه جمبه وعارفه انه بيروح للدكتور بس سايباه على راحته ومش قايلاله انها عارفه لانها عارفه انه بيعمل كده عشانهم وعشان مايتعبهمش وهى متفهمه موقفه

******************************

 

 الرواية كاملة متوفرة على موقعنا بشكل حصري اضغط هنا

أنتهت رحلتنا معهم إلي هذه الحد اتمني أن تكونوا استمتعوا معاهم وشاركتوهم كل تفاصيل حياتهم و اتمنى ان تكون الرواية افادتكم مش بس حاجه بتقروها وتسليكم

بقلم....أمانى السيد

تمت بحمد الله