مقلوبة الباذنجان السورى

مقلوبة الباذنجان السورى

المقادير
كيلو لحمه شقف ( كباب حلة )
٣ و نص كوب رز مصري
٢ كيلو بانجان الى ٢ و نص طويل و ثخين قليلا ( عروس )
٤ و ربع كوب مرقة سلق لحمه
ملح

للوجه
لحمه مفرومه مقلية و لها ملح و بهار
مكسرات لوز مقشر و صنوبر محمصين

الطريقة
يسلق اللحم مع عود قرفة و بضع حبات قرنفل و حب هال و فلفل اسود صحيح بضع حبات و ورق غار و بهار حلو و يمكن وضع رشة بهارات حسب الرغبة بعد النضج أقوم بإضافة الملح
نصفي قطع اللحم من المرق و البهارات
نقشر الباذنجان درب و درب و نقطعه لشرايح و يقلى بزيت غزير و يوضع في مصفى لينزل الزيت الزيادة او على ورق ماص و نقوم برش ملح عالبانجان
يغسل الأرز و ينقع بالماء نص ساعه و يصفى
نستعمل طنجرة تيفال و نصف البانجان على محيط الطنجرة بجانب بعض تماما بحيث قاعدة شرحة الباذنجان للأسفل و جزء منها في قاع الطنجرة و الباقي ملاصق لجانب الطنجرة و بعد الانتهاء من صف الشرائح على المحيط نملأ قاعدة الطنجرة بشرائح الباذنجان بنفس الشكل الشعاعي
نضع بضع قطع من اللحم فوق الباذنجان ثم نضع كمية من الأرز ترش رش فوق اللحم ثم نضع بضع قطع لحم و بضع شرايح بانجان دون ان نلصقهم ببعض يجب ان نضعهم بشكل متباعد حتى ما يشكلوا طبقة عازلة تمنع وصول الماء للأرز
نضع طبقة من الأرز و نعيد الكرة لحمه و باتنجان ثم أرز حتى انتهاء الكمية
اهم شي يبقى الباذنجان اللي على محيط الطنجرة اعلى من مستوى الأرز لو كان الباذنجان قصير يمكن وضع عدة شرايح بانجان كطبقة ثانية بحيث تلف على محيط الطنجرة و تكون بذلك فوق مستوى الرز بحيث بعد ان يستوي و ينتفخ يبقى ضمن شرايح البانجان و نحافظ على شكل القالب جميل
بعد انتهاء رش كامل كمية الرز يمكن وضع بضع قطع لحمه
نسخن ماء سلق اللحم لدرجة الغليان و نضيف له ملح لكل كاسة رز ملعقة صغيرة ملح
نصب المرق فوق الرز و يجب ان يغمر الرز بمقدار إصبعه عالأقل
نغطي الطنجرة و نضعها على نار عالية مدة ٣ دقايق بس حتى نلاحظ غليان المرقة ثم نوطي النار تماما تماما و تترك المقلوبه على نار هادية حتى يستوي الرز بالمرق و بالبخار
انا أخدت معي عالنار تقريبا ساعه او اقل شوي بس النار هادية جدا و ما انحرق شي ابدا
نطفي النار بعد التأكد من استواء الرز
و نبقي الطنجرة مغطايه و نتركها نص ساعه
انا لسهولة القلب و حتى ما يعلق شي معي بستعمل معلقة سيلكون السباتيولا و بحرر فيا أطراف المقلوبه عالداير يعني بدخل المعلقة بحركة عامودية ما بين طرف الطنجرة و البانجان المصفوف عالداير حتى أصل للقاع و هيك بتأكد أني حررت الاطراف تماما
بجيب صحن و بحطو فوق الطنجرة و بحركة سريعة بتقلبي الطنجرة
و انتظري ثواني و حركي الطنجرة بشكل دائري حركة متعاكسة باتجاه عقارب الساعه و عكس عقارب الساعه
رح تتاكدي انو الاطراف تحررت و نزلت المقلوبة متل القالب بالصحن
بتكوني قالية لحمه مفرومه مع بهار و ملح بتحطيها عالوش فوق المقلوبة و حواليها من القاعدة و اذا عندك مكسرات بتحمصيهم او بتقليهم حسب الرغبة و بتحطي كمان فوقها و حواليها
تقدم مع سلطة و عيران

ملاحظة
ممكن اللحمه قبل سلقها ان نقليها قليلا ثم تغمر بالماء و تسلق مع البهارات حسب الرغبة